សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តបាត់ដំបង បានអញ្ជើញជាអធិបតីដឹកនាំកិច្ចប្រជុំប្រចាំខែកក្កដា ដើម្បីតាមដានវឌ្ឍនភាពការ អនុវត្តផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ដែលកិច្ចប្រជុំនេះធ្វើឡើងនៅថ្ងៃទី១ ខែសីហា ឆ្នាំ២០២៦ នៅទីស្នាក់ការគណបក្សប្រជាជនកម្ពុជាខេត្តបាត់ដំបង។

មានរបាយការណ៍ស្វាគមន៍ក្នុងឱកាសនោះ ឯកឧត្តម សុខ លូ សមាជិកគណៈកម្មាធិការកណ្ដាល និងប្រធានគណៈកម្មាធិការគណបក្សប្រជាជនកម្ពុជាខេត្តបាត់ដំបង លើកឡើងថា អនុវត្តតាមអនុសាសន៍ណែនាំដ៏ខ្ពង់ខ្ពស់របស់សម្ដេចក្រឡាហោម ស ខេង គណៈកម្មាធិការគណបក្សខេត្ត បានដឹកនាំអនុវត្តកិច្ចការពង្រឹងកម្លាំងសាមគ្គីជាតិជាធ្លុងមួយក្នុងមហាជន មន្ត្រីសាធារណៈ និងពង្រឹងកម្លាំងគណបក្ស ដើម្បីការពារឧត្តមភាពរបស់គណបក្ស ការពារទឹកដី ការពារប្រជាជន ការពារសមិទ្ធផល និងជំរុញការអភិវឌ្ឍ ឆ្លើយតបសំណូមពរពលរដ្ឋ និងបានដឹកនាំត្រួតពិនិត្យធ្វើបច្ចុប្បន្នភាពអង្គការចាត់តាំងបក្សគ្រប់ថ្នាក់ គ្រប់ផ្នែកស្ថាប័ន ជំនួយការគណៈអចិន្ត្រៃយ៍គណបក្សខេត្ត ក្រុង ស្រុក និងសាខាបក្សភូមិ ក្រុមបក្ស គ្រួសារបក្ស សមាជិកបក្ស។

ឯកឧត្តម សង្កត់ធ្ងន់ថា គណៈកម្មាធិការគណបក្សខេត្តបានខិតខំជំរុញការផ្ដល់សេវាគ្រប់វិស័យជំនាញក្នុងក្របខណ្ឌគោលនយោបាយអាទិភាពរបស់រាជរដ្ឋាភិបាល និងខិតខំជំរុញកិច្ចអភិវឌ្ឍន៍ និងដោះស្រាយបញ្ហាចាំបាច់នានា ពិសេសការអន្តរាគមន៍ជួយសង្គ្រោះដំណាំស្រូវដែលរងផលប៉ះពាល់ដោយគ្រោះរាំងស្ងួត ជំរុញការចែកប័ណ្ណកម្មសិទ្ធិដីធ្លីមានលក្ខណៈជាប្រព័ន្ធ និងខិតខំដោះស្រាយទំនាស់ក្រៅប្រព័ន្ធតុលាការ។

សម្ដេចក្រឡាហោម ស ខេង មានប្រសាសន៍ថា ការបោះឆ្នោតជ្រើសរើសក្រុមប្រឹក្សាឃុំ សង្កាត់ ជាការបោះឆ្នោតថ្នាក់មូលដ្ឋានដែលស្ថិតនៅជាប់ផ្ទាល់ជាមួយប្រជាពលរដ្ឋ គឺជាដំណើរការបោះឆ្នោតដ៏មានសារសំខាន់សម្រាប់ប្រទេសជាតិ ជាពិសេសគណបក្សប្រជាជនកម្ពុជាក្នុងការបន្តគ្រប់គ្រង និងអភិវឌ្ឍន៍ប្រទេសជាតិ។

សម្ដេច ណែនាំដល់ក្រុមការងារគណបក្សត្រូវបន្តសកម្មភាពរបស់ខ្លួនក្នុងការបំពេញភារកិច្ចដែលគណបក្សបានប្រគល់ជូន និងត្រូវបន្តចុះទៅដល់មូលដ្ឋានផ្ទាល់ដើម្បីក្ដាប់ឱ្យបាននូវសភាពការណ៍ បញ្ហាប្រឈម មតិយោបល់ សំណើ និងសំណូមពរផ្សេងៗរបស់ប្រជាពលរដ្ឋនៅតាមមូលដ្ឋានដើម្បីចូលរួមដោះស្រាយបានទាន់ពេលវេលា ពង្រឹងភាពស្និទ្ធស្នាល និងបង្កើនជំនឿទុកចិត្តរបស់ប្រជាពលរដ្ឋចំពោះគណបក្ស។

សម្ដេច សង្ឃឹមជឿជាក់យ៉ាងមុតមាំថា ក្រុមការងារគណបក្សនឹងបន្តពង្រឹងការប្ដេជ្ញាចិត្តរួមគ្នា ដើម្បីនាំមកនូវជោគជ័យយ៉ាងត្រចះត្រចង់ជូនគណបក្សក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ នាពេលខាងមុខនេះ។

សូមជម្រាបថា សម្ដេចមហាបវរធិបតី ហ៊ុន ម៉ាណែត បានចេញសេចក្ដីសម្រេចកំណត់យកថ្ងៃអាទិត្យទី៦ ខែមិថុនា ឆ្នាំ២០២៧ ជាកាលបរិច្ឆេទនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦៕

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានបញ្ជាក់ថា ការកសាងវិស័យព័ត៌មានដែលមានគុណភាព មិនអាចពឹងផ្អែកតែលើច្បាប់ប៉ុណ្ណោះទេ ប៉ុន្តែត្រូវពឹងផ្អែកលើសុចរិតភាព សីលធម៌ វិជ្ជាជីវៈ និងការទទួលខុសត្រូវរួមរបស់អ្នកពាក់ព័ន្ធទាំងអស់ ដើម្បីកសាងបរិយាកាសព័ត៌មានដែលទទួលបានទំនុកចិត្តពីសាធារណជន។

ជាមួយគ្នានេះដែរ ឯកឧត្តមរដ្ឋមន្ត្រី នេត្រ ភក្ត្រា បានឱ្យដឹងថា ក្រសួងព័ត៌មានកំពុងបន្តធ្វើទំនើបកម្ម និងកែទម្រង់ក្របខណ្ឌលិខិតបទដ្ឋានគតិយុត្តក្នុងវិស័យព័ត៌មាន និងសោតទស្សន៍ ដើម្បីឱ្យស្របតាមបរិបទបរិវត្តកម្មឌីជីថល ការវិវត្តនៃបច្ចេកវិទ្យា និងនិន្នាការសកល ព្រមទាំងលើកកម្ពស់វិជ្ជាជីវៈសារព័ត៌មាន ការគោរពនីតិរដ្ឋ និងការផ្តល់សេវាសាធារណៈកាន់តែមានប្រសិទ្ធភាព។

ការលើកឡើងបែបនេះធ្វើឡើងក្នុងឱកាសឯកឧត្តមរដ្ឋមន្ត្រី នេត្រ ភក្ត្រា អញ្ជើញជាអធិបតីបើកសិក្ខាសាលាស្តីពី «ការផ្សព្វផ្សាយលិខិតបទដ្ឋានគតិយុត្តក្នុងវិស័យព័ត៌មាន និងសោតទស្សន៍» ក្រោមប្រធានបទ «គុណវុឌ្ឍិវិជ្ជាជីវៈ និងសេវាសាធារណៈ» ដែលរៀបចំដោយអគ្គនាយកដ្ឋានព័ត៌មាន និងសោតទស្សន៍ នៅថ្ងៃទី៣១ ខែកក្កដា ឆ្នាំ២០២៦ នៅទីស្តីការក្រសួង ដោយមានការចូលរួមពីអ្នកសារព័ត៌មានប្រមាណ ២៤០រូប។

ឯកឧត្តមរដ្ឋមន្ត្រីក្រសួងព័ត៌មាន បានបញ្ជាក់ថា ក្នុងយុគសម័យឌីជីថល វិស័យព័ត៌មាន និងសោតទស្សន៍ មានតួនាទីសំខាន់ក្នុងការតភ្ជាប់ទំនាក់ទំនងរវាងរាជរដ្ឋាភិបាល និងប្រជាពលរដ្ឋ ព្រមទាំងរួមចំណែកកសាងសាធារណមតិ និងជំរុញការអភិវឌ្ឍសង្គម។ ទន្ទឹមនឹងនេះ វិស័យព័ត៌មានក៏កំពុងប្រឈមនឹងបញ្ហាថ្មីៗ ដូចជា ព័ត៌មានក្លែងក្លាយ ព័ត៌មានបំពុល ការប្រើប្រាស់បច្ចេកវិទ្យាបញ្ញាសិប្បនិម្មិត (AI) និងបច្ចេកវិទ្យា Deepfake ដែលទាមទារឱ្យគ្រប់ភាគីប្រើប្រាស់បច្ចេកវិទ្យាប្រកបដោយការទទួលខុសត្រូវ គោរពច្បាប់ និងក្រមសីលធម៌វិជ្ជាជីវៈ។

ឯកឧត្តមបានសង្កត់ធ្ងន់ថា រាជរដ្ឋាភិបាលមិនចាត់ទុកវិស័យព័ត៌មាន និងសោតទស្សន៍ គ្រាន់តែជាវិស័យអាជីវកម្ម ឬជាវេទិកាបញ្ចេញមតិប៉ុណ្ណោះទេ ប៉ុន្តែជាសសរស្តម្ភដ៏សំខាន់សម្រាប់ការកសាងប្រជាធិបតេយ្យ លើកកម្ពស់អភិបាលកិច្ចល្អ ពង្រឹងសន្តិសុខព័ត៌មាន និងកសាងទំនុកចិត្តរវាងរដ្ឋ និងប្រជាពលរដ្ឋ។ ដូច្នេះ ការគ្រប់គ្រងវិស័យព័ត៌មានត្រូវរក្សាសមតុល្យរវាងសេរីភាព និងការទទួលខុសត្រូវ សិទ្ធិ និងកាតព្វកិច្ច ព្រមទាំងនវានុវត្តន៍ និងនីតិរដ្ឋ។

ក្នុងឱកាសនោះ ឯកឧត្តមរដ្ឋមន្ត្រីក្រសួងព័ត៌មាន បានបង្ហាញពីទិសដៅសំខាន់ៗរបស់ក្រសួងព័ត៌មាន រួមមានការធ្វើបច្ចុប្បន្នភាពលិខិតបទដ្ឋានគតិយុត្តដែលលែងសមស្រប ការរៀបចំក្រមបទដ្ឋានគតិយុត្តវិស័យព័ត៌មាន ការធ្វើឱ្យនីតិវិធីកាន់តែងាយស្រួល និងមានតម្លាភាព ការធ្វើទំនើបកម្មប្រព័ន្ធគ្រប់គ្រងទិន្នន័យអង្គភាពសារព័ត៌មាន និងអាជ្ញាបណ្ណតាមប្រព័ន្ធឌីជីថល ព្រមទាំងការជំរុញយន្តការគ្រប់គ្រងដោយខ្លួនឯង (Self-regulation) តាមរយៈការគោរពក្រមសីលធម៌វិជ្ជាជីវៈ និងការផ្ទៀងផ្ទាត់ព័ត៌មាន។

ជាមួយគ្នានេះ ឯកឧត្តមរដ្ឋមន្ត្រី នេត្រ ភក្ត្រា បានណែនាំឱ្យមានការបកស្រាយឱ្យបានច្បាស់លាស់អំពីក្របខណ្ឌច្បាប់ពាក់ព័ន្ធនឹងអ្នកផលិតមាតិកា (Content Creators) អ្នកមានឥទ្ធិពលលើបណ្ដាញសង្គម (Influencers) និងការធ្វើអាជីវកម្មព័ត៌មានលើបណ្តាញសង្គម ដើម្បីឱ្យការអនុវត្តសកម្មភាពទាំងនេះស្របតាមច្បាប់ និងមិនប៉ះពាល់ដល់សណ្ដាប់ធ្នាប់សាធារណៈ សន្តិសុខព័ត៌មាន និងសីលធម៌សង្គម។

ឯកឧត្តមរដ្ឋមន្ត្រី នេត្រ ភក្ត្រា ក៏បានអំពាវនាវឱ្យអ្នកសារព័ត៌មានទាំងអស់ប្រកាន់ខ្ជាប់នូវគោលការណ៍ «ត្រឹមត្រូវ ពិតប្រាកដ និងទទួលខុសត្រូវ» ជៀសវាងការផ្សព្វផ្សាយព័ត៌មានដែលមិនបានផ្ទៀងផ្ទាត់ ព័ត៌មានក្លែងក្លាយ ឬព័ត៌មានដែលប៉ះពាល់ដល់កិត្តិយស សេចក្តីថ្លៃថ្នូរ និងសិទ្ធិបុគ្គល។ ទន្ទឹមនឹងនេះ ក្រសួងព័ត៌មាននឹងបន្តការពារសិទ្ធិ និងផលប្រយោជន៍ស្របច្បាប់របស់អ្នកសារព័ត៌មានអាជីព ដែលបំពេញភារកិច្ចដោយសុចរិតភាព និងវិជ្ជាជីវៈ។

ឯកឧត្តមរដ្ឋមន្ត្រី នេត្រ ភក្ត្រា ក៏បានណែនាំដល់អ្នកសារព័ត៌មានឱ្យគោរពសិទ្ធិ និងសេចក្តីថ្លៃថ្នូររបស់ស្ត្រី កុមារ ជនមានពិការភាព និងជនងាយរងគ្រោះ ក្នុងពេលរាយការណ៍ព័ត៌មាន ព្រមទាំងជំរុញការអប់រំអំពីការប្រើប្រាស់ព័ត៌មាន និងប្រព័ន្ធផ្សព្វផ្សាយ (Media and Information Literacy) ដើម្បីលើកកម្ពស់សមត្ថភាពរបស់សាធារណជនក្នុងការផ្ទៀងផ្ទាត់ព័ត៌មាន និងទប់ស្កាត់ព័ត៌មានក្លែងក្លាយ។

នៅក្នុឱកាសនោះដែរ ឯកឧត្តមរដ្ឋមន្ត្រី នេត្រ ភក្ត្រា បានបង្ហាញជំនឿថា លទ្ធផលនៃសិក្ខាសាលានេះ នឹងរួមចំណែកពង្រឹងការយល់ដឹងអំពីច្បាប់ លើកកម្ពស់ការគោរពនីតិរដ្ឋ និងការអភិវឌ្ឍវិស័យព័ត៌មាន និងសោតទស្សន៍នៅកម្ពុជា ឱ្យកាន់តែមានគុណភាព វិជ្ជាជីវៈ តម្លាភាព និងចីរភាព៕