ក្នុងឱកាសជួបសំណេះសំណាលជាមួយនិវត្តជនក្រសួងរ៉ែ និងថាមពល អាជ្ញាធរអគ្គិសនីកម្ពុជា និងអគ្គិសនីកម្ពុជា ក្នុងឱកាសបុណ្យដាក់បិណ្ឌ និងភ្ជុំបិណ្ឌ នៅថ្ងៃទី២៨ ខែកញ្ញា ឆ្នាំ២០២៦ រដ្ឋមន្ត្រីក្រសួងរ៉ែ និងថាមពល បានលើកឡើងថា ក្រោយថ្ងៃរំដោះ ៧មករា ឆ្នាំ១៩៧៩ ថ្នាក់ដឹកនាំកម្ពុជា ក៏ដូចជានិវត្តជនក្នុងវិស័យនានា បានខិតខំកសាងប្រទេសពីបាតដៃទទេ ឱ្យមានការរីកចម្រើនលើគ្រប់វិស័យ ដោយឡែកក្នុងវិស័យរ៉ែ និងថាមពល ក៏មានការរីកចម្រើនគួរឱ្យកត់សម្គាល់។
ឯកឧត្តមរដ្ឋមន្ត្រី កែវ រតនៈ បានបន្តថា ចំពោះវិស័យរ៉ែ និងថាមពលនេះ ដែលជាសមិទ្ធផលបន្សល់មកពីនិវត្តជន ធ្វើឱ្យកម្ពុជាមានស្ថិរភាពលើការផ្គត់ផ្គង់អគ្គិសនី ប្រជាពលរដ្ឋមានភ្លើងអគ្គិសនី ប្រើប្រាស់គ្រប់គ្រាន់ បើទោះបីជាលែងនាំចូលពីប្រទេសថៃ ដែលបង្កឡើងដោយជម្លោះព្រំដែន ខណៈចំណូលបានមកពីវិស័យរ៉ែ និងថាមពល ក៏បានរួមចំណែកក្នុងការជំរុញកំណើនសេដ្ឋកិច្ចជាតិ។
ជាមួយនេះ ឯកឧត្តមរដ្ឋមន្ត្រី កែវ រតនៈ ក៏បានថ្លែងអំណរគុណដល់និវត្តជន ដែលបានខិតខំប្រឹងប្រែងបំពេញការងារនាពេលកន្លងមក ហើយបានធ្វើឱ្យវិស័យរ៉ែ និងថាមពល ទទួលបានសមិទ្ធផលជាផ្លែផ្កា និងជាទីមោទនក្នុងពេលបច្ចុប្បន្ននេះ។
សម្រាប់ឯកឧត្តម ប្រាំង ជលសា ប្រតិភូរាជរដ្ឋាភិបាល ទទួលបន្ទុកជាអគ្គនាយកអគ្គិសនីកម្ពុជា បានលើកឡើងថា ការជួបជុំនិវត្តជនរបស់អគ្គិសនីកម្ពុជា បានរៀបចំធ្វើឡើងមានចំនួន ១១លើករួចមកហើយ ដោយឡែកសម្រាប់ការប្រារព្ធធ្វើនៅឆ្នាំ២០២៦មានចំនួន៦៨៩នាក់ (ស្ត្រី៩៧នាក់) ដែលការជួបជុំនេះ ក្នុងគោលបំណងដើម្បីផ្សារភ្ជាប់ទំនាក់ទំនង រវាងអ្នកជំនាន់មុន និងអ្នកជំនាន់ក្រោយ ក្នុងវិស័យអគ្គិសនី ជាពិសេសដឹងគុណ ពីការចូលរួមចំណែកកសាងអគ្គិសនីកម្ពុជា របស់រៀមច្បងដែលបានបំពេញភារកិច្ចកសាងវិស័យនេះពីចំណុចចាប់ផ្ដើមរហូតដល់មានការីកចម្រើន និងផ្គត់ផ្គង់ទូទាំងប្រទេសដូចបច្ចុប្បន្ននេះ។
អគ្គនាយកអគ្គិសនីកម្ពុជា បានបន្ថែមថា ក្រោមកិច្ចខិតខំប្រឹងប្រឹងពីថ្នាក់ដឹកនាំជំនាន់មុន និងនិវត្តន៍ជនអគ្គិសនីកម្ពុជា គឺនៅឆ្នាំ២០២៦នេះ អគ្គិសនីកម្ពុជា បានចាប់ផ្ដើមប្រើប្រាស់អនុស្ថានីយប្រភេទចល័ត ដែលផ្ដល់ភាពងាយស្រួលលឿន ក្នុងការផ្ទេរពីទីតាំងមួយទៅទីតាំងមួយ ដែលមានតម្រូវការបន្ទាន់ បម្រើដល់បន្ទុកប្រើប្រាស់ រួមមានវិស័យឧស្សាហកម្មធន់ធ្ងន់ ក៏ដូចជាបម្រុងទុកជាដើម។ បច្ចុប្បន្នបានដាក់ឱ្យដំណើរការចំនួន៣ហើយ ដោយ៥ទៀតនឹងមកដល់ក្នុងចុងឆ្នាំ២០២៦ ដែលជួយសម្រួលបង្កើនគុណភាពនៃការផ្គត់ផ្គង់ដល់តំបន់មួយចំនួនដែលត្រូវការចាំបាច់។
ឯកឧត្តម ប្រាំង ជលសា បានបន្តថា ប្រព័ន្ធ Hotline គឺជាស្ពានមួយក្នុងការភ្ជាប់ទំនាក់ទំនងជាមួយ អតិថិជន ដែលអាចឱ្យថ្នាក់ដឹកនាំបាន ដឹងអំពីការបម្រើសេវាកម្ម និងកាត់បន្ថយភាពចន្លោះប្រហោងក្នុងការអនុវត្តការងាររបស់និយោជិត អគ្គិសនីកម្ពុជា បានឈានមុខក្នុងការងារនេះ ហើយបានទទួលការកោតសរសើរពីប្រជាពលរដ្ឋទូទៅ និងកំពុងជួយផ្តល់បទពិសោធន៍ដល់មន្ត្រីរបស់អាជ្ញាធរអគ្គិសនីកម្ពុជា ដើម្បីបន្តជួយបណ្តុះបណ្តាលដល់សេវាករឯកជន។ ដើម្បីចូលរួមឱ្យមានសមធម៌ក្នុងសង្គម អគ្គិសនីកម្ពុជា បានផ្ដល់ជំនួយយ៉ាងច្រើនសន្ធឹកសន្ធាប់ដូចជា៖ តាមរយៈមូលនិធិអគ្គិសនីភាវូបនីយកម្មជនបទ បានឧបត្ថម្ភធនដល់សេវាករ ប្រមាណ ១.០០០លានដុល្លារអាមេរិក (ដោយគិតចាប់តាំងពីឆ្នាំ២០១៦ មកទល់បច្ចុប្បន្ន) ដើម្បីជំរុញអត្រាភ្ជាប់ចរន្តអគ្គិសនី និងរក្សាថ្លៃឯកភាពទូទាំងប្រទេស។
ក្នុងឱកាសនោះដែរ ឯកឧត្តម ស៊ុយ សែម តំណាងរាស្ត្រមណ្ឌលខេត្តពោធិ៍សាត់ ក៏បានអំពាវនាវដល់និវត្តជនទាំងអស់ សូមបន្តថែរក្សាសុខភាព ដើម្បីបានបន្តឃើញនូវសមិទ្ធផលបន្ថែមទៀត របស់អ្នកបន្តវេនជំនាន់ក្រោយ ដែលបានខិតខំកសាងប្រទេសជាតិឱ្យកាន់តែរីកចម្រើន។
ក្នុងពេលចូលរួមពិធីសំណេះសំណាលនេះ និវត្តជនអគ្គិសនីកម្ពុជា លើកឡើងថា ការជួបសំណេះសំណាលប្រចាំឆ្នាំ ពីសំណាក់ថ្នាក់ដឹកនាំក្រសួងរ៉ែ និងថាមពល បានបង្ហាញពីការយកចិត្តទុកដាក់ ចំពោះនិវត្តជន ហើយកាន់តែធ្វើឱ្យពួកគាត់មានសង្ឃឹមលើថ្នាក់ដឹកនាំ និងថាការប្រឹងប្រែងរបស់ពួកគាត់នាពេលកន្លងមក ពិតជាមានតម្លៃ៕
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅថ្ងៃទី២៨ ខែកញ្ញា ឆ្នាំ២០២៦ បានអញ្ជើញចុះត្រួតពិនិត្យផ្ទាល់ និងសួរសុខទុក្ខប្រជាពលរដ្ឋដែលរងគ្រោះដោយទឹកជំនន់ នៅខេត្តបន្ទាយមានជ័យ។
អមដំណើរជាមួយសម្តេចនាយករដ្ឋមន្រ្តី រួមមាន៖ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម អភិបាលខេត្តបន្ទាយមានជ័យ អភិបាលខេត្តបាត់ដំបង និងមន្រ្តីពាក់ព័ន្ធមួយចំនួនទៀត៕
(បន្ទាយមានជ័យ)៖ រដ្ឋបាលខេត្តបន្ទាយមានជ័យ បានរៀបចំពិធីចុះហត្ថលេខាលើផែនទីព្រំប្រទល់រដ្ឋបាលឃុំ-សង្កាត់ក្នុងភូមិសាស្ត្រខេត្ត ដើម្បីជំរុញឱ្យការងារចុះបញ្ជីដីធ្លីមានលក្ខណៈជាប្រព័ន្ធ និងដំណើរការដោយរលូន។
ពិធីនេះបានប្រារព្ធឡើងក្រោមអធិបតីភាពឯកឧត្តម ឡោ ដាវុធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ តំណាងឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម រួមនឹងប្រតិភូអមដំណើរ។
ពិធីនេះក៏មានការចូលរួមពីឯកឧត្តម ប្លែក វ៉ារី ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលខេត្តបន្ទាយមានជ័យ ថ្នាក់ដឹកនាំរដ្ឋបាលខេត្តខេត្តបាត់ដំបង និងខេត្តឧត្តរមានជ័យផងដែរ។
ក្រុមការងារចម្រុះបានពិនិត្យ និងគូសព្រំប្រទល់រដ្ឋបាលឃុំ-សង្កាត់ទាំង៦៧ ឱ្យត្រូវនឹងការគ្រប់គ្រងជាក់ស្តែងរបស់អាជ្ញាធរដែនដី ដោយផ្អែកលើផែនទីព្រំប្រទល់ដែលចេញដោយក្រសួងមហាផ្ទៃ រួមទាំងព្រំប្រទល់ដែលបាន ឯកភាពគ្នា រវាងខេត្តឧត្តរមានជ័យ និងខេត្តបាត់ដំបង។ ពិធីចុះហត្ថលេខានេះបានធ្វើឡើងនៅសាលប្រជុំ ក សាលាខេត្តបន្ទាយមានជ័យ នាព្រឹកថ្ងៃទី១៧ ខែកញ្ញា ឆ្នាំ២០២៦។
ការរៀបចំ និងកំណត់ព្រំប្រទល់រដ្ឋបាលនេះ គឺអនុលោមតាមមាត្រា៨៥ នៃច្បាប់ស្តីពីការគ្រប់គ្រងរដ្ឋបាលឃុំ-សង្កាត់ឆ្នាំ២០០១ និងប្រកាសលេខ ៤៩៣ ប្រក ចុះថ្ងៃទី៣០ ខែមេសា ឆ្នាំ២០០១ របស់ក្រសួងមហាផ្ទៃ។
ទោះបីជាព្រំប្រទល់មួយចំនួនត្រូវបានកែប្រែជាបន្តបន្ទាប់ ដើម្បីឆ្លើយតបនឹងការគ្រប់គ្រងរដ្ឋបាល ការអភិវឌ្ឍមូលដ្ឋាន និងតម្រូវការជាក់ស្តែងក៏ដោយ ក៏នៅមានចំណុចខ្វះខាតខ្លះនៅពេលកំណត់ព្រំប្រទល់លើដីជាក់ស្តែង។ ដូច្នេះ ការពិនិត្យរួមគ្នា សម្របសម្រួល និងដោះស្រាយឱ្យបានសមស្របនូវចំណុចដែលពុំទាន់ច្បាស់លាស់ គឺជារឿងចាំបាច់។
ការងារនេះនឹងរួមចំណែកយ៉ាងសំខាន់ក្នុងការធានានូវប្រសិទ្ធភាព នៃការគ្រប់គ្រងរដ្ឋបាល ការផ្តល់សេវាសាធារណៈ និងការថែរក្សាសន្តិសុខសណ្តាប់ធ្នាប់សាធារណៈក្នុងមូលដ្ឋាន៕
